Á Ársmøtinum í 2021 varð kunnað um, at arbeitt verður við einum háskúla í Nesvík. Í fjør varð umsókn send Landsstýrinum um fíggjarligan stuðul til háskúlan. Løgtingið játtaði 1,35 milliónir kr. í stuðli til háskúlan. Viðtøkurnar fyri háskúlan siga, at høvuðsstýrið hjá Kirkjuligu Heimamissiónini velur skúlastýrið, sum er mannað við 9 limum. Skúlastýrið skipar seg sjálvt við formanni, næstformanni og kassameistara. Tað er skúlastýrið, sum eftir góðkenning frá Høvuðsstýrinum setur skúlaleiðaran.
Háskúlin í Nesvík varð settur á stovn av Kirkjuligu Heimamissiónini í februar 2022. Ynski varð um at geva ungum eitt vakstrarumhvørvi, har tey kunnu trívast og búnast, likamliga, sálarliga og andaliga.
Hyggja vit aftur í tíðina, hevur háskúli verið uppá tal fyrr og royndir eru gjørdar við bíbliuskúla ymsastaðni í Føroyum og í ymiskum sniði. Í 2021 tók prát seg upp um møguleikan at seta á stovn Háskúla í samstarvi millum Heimamissiónina og Uttanríkis- og Mentamálaráðið og hetta bar á mál og fingu vit góðkenning at fara í gongd.
Eitt skúlastýrið varð valt og síðan fór arbeiðið í gongd. Serliga var tað Bergur Debes Joensen, og Ásbjørn Jacobsen, sum vissiónsberar og ávíkavist formaður og næstformaður í fyrsta skúlastýrinum fyri Háskúlan í Nesvík, og Símun Jacobsen og Andrias Magnussen ávíkavist formaður og aðalskrivari hjá heimamissiónini, sum gjørdu arbeiði, soleiðis at Háskúlin í Nesvík at enda gjørdist verðuleiki
Visjónin fyri Háskúlan er, at ung hava tørv á einum skúla við týðuligum kristiligum innihaldi, har tey kunnu búnast andaliga samstundis sum tey hava tað gott og stuttligt, og møguleika at fáa vinir fyri lívið. Vit ynskja, at Háskúlin í Nesvík skal gerast ein miðdepil, har ung skulu kenna seg sædd, hoyrd, góðkend og vælkomin. Eisini er tað umráðandi at skúlin hevur undirvísarar, sum trívast á skúlanum og ynskja at geva undirvísing við høgari góðsku, so vit kunna verða við til at stuðla undir og útbúgva ung til trúfesti og arbeiðssemi.
